首頁  找工作  填履歷 
婆婆枉死急症室 醫療亂象鑊鑊甘
已被流覽了

太一叮多次警告醫管局,快啲根治急症室人手不足頑疾,否則遲早爆大鑊。可惜言者諄諄,聽者藐藐,當局闊佬懶理,唔嗲唔吊,結果真係搞出人命!

話說早前一名九十八歲老婦因為間歇性嘔吐到沙田威爾斯醫院急症室求診,醫護人員檢查指血壓正常、神志清醒,分流為「次緊急」類別。點知等候期間老婦多次懷疑嘔血,面色轉差,家人屢向醫護人員要求盡快安排醫生診治不果,一直呆等咗十個鐘頭至獲醫生診症,再由情況穩定等到神志不清,先至獲安排上病房救治,其後病情急轉直下,結果留醫十五小時不治。院方指,初步懷疑病人腦幹中風。

唉,病人由神志清醒等到神志不清,由嘔吐等到嘔血,急症室究竟係救人定害人吖?所謂病向淺中醫,病人等咗成晚都無人理,就算後生仔都頂唔順,何況婆婆,唔出事至奇啦。可以咁講,如果婆婆早啲得到診治,早啲送上病房救治,可能唔使死,可惜現實中無如果呢回事。難怪婆婆家人質疑院方要病人苦等十個鐘頭,根本就係漠視病人,延誤診治。其實,公立醫院何只漠視病人,簡直草菅病人就真。

退一步講吖,醫者父母心,見到一個九十八歲嘅老人家又嘔吐,又不適,仲懷疑嘔血添,稍有惻隱之心嘅,都唔會忍心要佢喺急症室苦候十個鐘頭啦,公院唔係收買人命又係乜嘢呀?

急症室變成閻王殿,原因一字咁淺,就係醫護人手不足。威院回應話喎,婆婆求診當日全日求診人數共五百三十一人,其中次緊急病人平均輪候二百四十四分鐘先至獲診治,最長輪候逾十二小時。咁即係話,好多病人嘅輪候時間仲長過死者,問你服未!

嗱,唔係嚇大家o架,當局對急症室人手短缺問題束手無策,至今毫無進展,如果呢個問題唔解決,遲早又出事嘅咋。早前醫管局搞咗個急症室支援服務先導計劃,諗住招募兼職醫護頂檔,點知反應參差,有偏遠地區急症室只獲派到兩名兼職醫生,杯水車薪,只係得啖笑。所以話啫,能醫不自醫,急症室人手短缺醫極都無起色,病人求診等到死又有乜嘢出奇吖。

一句講晒,婆婆枉死急症室,醫療亂象鑊鑊甘。醫管局快啲諗辦法根治急症室人手短缺問題啦,尤其農曆新年假期就到,私家診所放假,急症室勢必逼爆,萬一又搞出人命,港產官僚咪想安安樂樂過蛇年呀,叮!

昔日太陽

2013.02.08


admin發表於:2013/3/7 醫護好工 Bamboos.hk 全港唯一醫護求職及招聘平台